ದಕ್ಷಿಣ ಭಾರತದ ಗುಡ್ಡಗಾಡು ಪ್ರದೇಶದಲ್ಲಿ ಅಥವಾ ನಗರದ ಹೊರವಲಯದಲ್ಲಿ ನೀವು ನಡೆದಾಡುವಾಗ, ಬಿಸಿಲು ಕಾಯಿಸಿಕೊಳ್ಳುತ್ತಿರುವ ಪ್ರಕಾಶಮಾನವಾದ ಬಣ್ಣಗಳಿಂದ ಮಿನುಗುವ ಹಲ್ಲಿಯನ್ನು ಖಂಡಿತ ಕಾಣಬಹುದು. ವೈಜ್ಞಾನಿಕವಾಗಿ, ಪೆನಿನ್ಸುಲಾರ್ ರಾಕ್ ಅಗಾಮ (ಸಾಮ್ಮೊಫಿಲಸ್ ಡೋರ್ಸಲಿಸ್) ಎಂದು ಕರೆಯಲ್ಪಡುವ, ಆಕರ್ಷಕ ಬಣ್ಣಗಳನ್ನು ಹೊಂದಿರುವ ಈ ಪುರುಷ ಅಗಾಮಗಳು, ಕೆಲವೊಮ್ಮೆ ತಮ್ಮ ಅಗಾಧವಾದ ಕೆಂಪು, ಗಾಢ ಕಿತ್ತಳೆ ಬಣ್ಣ ಅಥವಾ ತಿಳಿ ಹಳದಿ ಬಣ್ಣಗಳನ್ನು ಕೆಲವೇ ಕ್ಷಣಗಳೊಳಗೆ ಬದಲಾಯಿಸುತ್ತವೆ ಮತ್ತು ಇವುಗಳು ಕಲ್ಲು ಬಂಡೆಗಳ ಕವಲುಗಳಲ್ಲಿ ಕುಳಿತು ತಮ್ಮ ತಲೆಯನ್ನು ಅಲ್ಲಾಡಿಸುತ್ತಿರುತ್ತವೆ. ಆದರೆ, ಇವುಗಳ ತುಡಿಯುತ್ತಿರುವ ನೋಟ ಮತ್ತು ನಿರ್ದೇಶಿಸಿದಂತೆ ಕಂಪಿಸುವುದರ ಹಿಂದೆ ಏನಡಗಿದೆ? ಬೆಂಗಳೂರಿನ ಭಾರತೀಯ ವಿಜ್ಞಾನ ಸಂಸ್ಥೆಯ ಶ್ರೀಕಾಂತ್ ದೇವಧರ್ ಮತ್ತು ಕವಿತಾ ಈಶ್ವರನ್ ರವರು, ಅತ್ಯಂತ ಆಕರ್ಷಕವಾದ ಪುರುಷ ಅಗಾಮಗಳು (ಹಲ್ಲಿಗಳು) ಪ್ರದರ್ಶಿಸುವ ವಿವಿಧ ವರ್ತನೆಯ ಸಂಕೇತಗಳ ಅರ್ಥವನ್ನು ಡಿಕೋಡ್ ಮಾಡಲು ತಮ್ಮ ಹೊಸ ಅಧ್ಯಯನದಲ್ಲಿ ಪ್ರಯತ್ನಿಸಿದ್ದಾರೆ.

"ಕಾಡಿನಲ್ಲಿ ಅಗಾಮಗಳನ್ನು ವೀಕ್ಷಿಸಲು, ಅವಲೋಕಿಸಲು ಮತ್ತು ಹಿಂಬಾಲಿಸಲು ಸುಲಭ ಸಾಧ್ಯ. ಇವುಗಳ ಜೀವಿತಾವಧಿ ಒಂದು ವರ್ಷ ಮಾತ್ರ; ಆದ್ದರಿಂದ ನಾವು ಅವುಗಳ ಜೀವಿತಾವಧಿಯ ಮುಖ್ಯ ಹಂತಗಳನೆಲ್ಲಾ ತಿಳಿಯಬಹುದು ಮತ್ತು ಕೆಲವು ವರ್ಷಗಳಲ್ಲಿ ಅವುಗಳ ಹಲವು ತಲೆಮಾರುಗಳನ್ನು ಅಧ್ಯಯನ ಮಾಡಬಹುದು. ಆದರೆ, ಬಹಳ ಇತ್ತೀಚೆಗೆ ನಾವು ಅವುಗಳನ್ನು ಅರ್ಥ ಮಾಡಿಕೊಳ್ಳಲು ಪ್ರಾರಂಭಿಸಿದ್ದೇವೆ" ಎಂದು ಈ ಅಧ್ಯಯನದ ಪ್ರಮುಖ ಲೇಖಕರಾದ ಶ್ರೀಕಾಂತ್ ದೇವಧರ್ ರವರು, ಈ ಆಕರ್ಷಕ ಅಗಾಮಗಳನ್ನು ತಮ್ಮ ಅಧ್ಯಯನಕ್ಕಾಗಿ ಯಾಕೆ ಆರಿಸಿಕೊಂಡರು ಎಂಬುದರ ಕುರಿತು ಹೇಳುತ್ತಾರೆ.

ಈ ಅಧ್ಯಯನವು ಇತ್ತೀಚೆಗೆ "ಫ್ರಾಂಟಿಯರ್ಸ್ ಇನ್ ಎಕಾಲಜಿ ಎಂಡ್ ಎವಲ್ಯೂಷನ್" ಎಂಬ ನಿಯತಕಾಲಿಕೆಯಲ್ಲಿ ಪ್ರಕಟಗೊಂಡಿದೆ ಮತ್ತು ಈ ಅಧ್ಯಯನಕ್ಕಾಗಿ ಧನಸಹಾಯವನ್ನು ಐಐಎಸ್ಸಿ-ಡಿಬಿಟಿ ಸಹಭಾಗಿತ್ವದ ಕಾರ್ಯಕ್ರಮ, ವಿಜ್ಞಾನ ಮತ್ತು ತಂತ್ರಜ್ಞಾನ ಇಲಾಖೆ ಮತ್ತು ಮಾನವ ಸಂಪನ್ಮೂಲ ಅಭಿವೃಧ್ದಿ ಸಚಿವಾಲಯಗಳಿಂದ ಪಡೆದುಕೊಂಡಿದೆ.

ಸಂಶೋಧಕರು ಈ ಕುರಿತು ತಮ್ಮ ಅಧ್ಯಯನವನ್ನು, ಆಂಧ್ರಪ್ರದೇಶದ ರಿಷಿ ಕಣಿವೆಯಲ್ಲಿ, 41 ಪುರುಷ ಅಗಾಮಗಳನ್ನು ಅವುಗಳ ಜೀವಿತಾವಧಿಯಲ್ಲಿ ಹಿಂಬಾಲಿಸಿ ಕೈಗೊಂಡಿದ್ದಾರೆ. ವಿಜ್ಞಾನಿಗಳಿಗೆ ಅವುಗಳು ಮತ್ತೆ ಮತ್ತೆ ಕಾಣಿಸಿಕೊಂಡಿದ್ದರೂ ಸಹ ಅವುಗಳ ವರ್ತನೆ ಬಗ್ಗೆ ಹೆಚ್ಚು ತಿಳಿದಿಲ್ಲ. ತಮ್ಮ ಅಧ್ಯಯನದ ಮೊದಲ ಹಂತವಾಗಿ, ಸಂಶೋಧಕರು ಈ ಅಗಾಮಗಳ ತೋರಿಕೆಯ ವರ್ತನೆಗಳನ್ನು ಅರ್ಥ ಮಾಡಿಕೊಳ್ಳಬೇಕಾಗಿತ್ತು.

"ಪುರುಷ ಅಗಾಮಗಳು ಒಂದೇ ಸಮಯದಲ್ಲಿ, ತಲೆಯನ್ನು ಅಲ್ಲಾಡಿಸುತ್ತ ಮತ್ತು ಕಿತ್ತಳೆ ಬಣ್ಣದಿಂದ ಮಿನುಗುತ್ತ, ಬಹುವರ್ತನೆಗಳನ್ನು ತೋರ್ಪಡಿಸುವುದನ್ನು ನಾವು ಶೀಘ್ರದಲ್ಲೇ ಕಂಡುಹಿಡಿದಿದ್ದೇವೆ " ಎಂದು ಶ್ರೀಕಾಂತ್ ದೇವಧರ್ ರವರು ಸ್ಮರಿಸಿಕೊಳ್ಳುತ್ತಾರೆ.

ಅಗಾಮಗಳ ಬಹುವರ್ತನೆಯ ಹಿಂದಿನ ಕಾರಣ ಮತ್ತು ಇವುಗಳು ನೀಡುವ ಸಂಜ್ಞೆಗಳು ಯಾರಿಗಾಗಿ ಎಂಬುದನ್ನು ಸಂಶೋಧಕರು ವಿವರವಾಗಿ ಪರೀಕ್ಷಿಸಿದಾಗ ಕಂಡುಬಂದ ಪ್ರಾಥಮಿಕ ಕಾರಣವೆಂದರೆ, ಅವುಗಳು ಹೆಣ್ಣು ಹಲ್ಲಿಗಳನ್ನು ಪ್ರೀತಿಗಾಗಿ ಹುಡುಕುವ ಮತ್ತು ಮೆಚ್ಚಿಸುವ ಪರಿ ಎಂದು ತಿಳಿದಿದೆ.

“ಇದೊಂಥರಾ ಕಾರು ಮತ್ತು ಬಂಗಲೆಗಳನ್ನು ಹೊಂದಿರುವವರು, ತಾವು ಶ್ರೀಮಂತರು ಮತ್ತು ಆರೋಗ್ಯವಂತರೆಂದು ಇತರರಿಗೆ ತ್ವರಿತವಾಗಿ ಪ್ರಚಾರ ನೀಡಿದಂತೆ”, ಎಂದು ಹಾಸ್ಯ ಮಾಡುತ್ತಾರೆ  ಶ್ರೀಕಾಂತ್ ದೇವಧರ್ ರವರು.
ಪುರುಷ ಅಗಾಮಗಳು ತನ್ನ ಸುತ್ತಮುತ್ತ ಹೆಣ್ಣು ಅಗಾಮಗಳು ಇರುವಾಗ, ತೋರುವ ಸಂಜ್ಞೆಗಳು ಹೆಚ್ಚು ಪುನರಾವರ್ತನೆಗೊಂಡಿರುವುದನ್ನು ಇವರು ಗಮನಿಸಿದ್ದಾರೆ.

“ಬಹು ಸಂಜ್ಞೆಗಳನ್ನು ನೀಡುವ ಹಲ್ಲಿಗಳು ಹೆಚ್ಚಿನ ಗುಣಮಟ್ಟದವೆಂದು ಸೂಚಿಸುತ್ತವೆ; ಇದು ಪ್ರಾಯಶಃ ತಾವು ಪರಿಪೂರ್ಣವೆಂದು ತಿಳಿಸುವ ಪ್ರಯತ್ನ” ಎಂದು ಶ್ರೀಕಾಂತ್ ದೇವಧರ್ ಹೇಳುತ್ತಾರೆ.

ಹೆಣ್ಣು ಅಗಾಮಗಳನ್ನು ಮೆಚ್ಚಿಸುವುದಷ್ಟೇ ಅಲ್ಲದೇ, ಇವುಗಳ ಬಣ್ಣಗಳಿಗೆ ಮತ್ತಷ್ಟು ಕಾರಣಗಳಿವೆ. ತಮ್ಮ ಸಮೀಪದಲ್ಲಿ ಪ್ರತಿಸ್ಪರ್ಧಿ ಪುರುಷ ಅಗಾಮಗಳಿದ್ದರೆ, ಇವುಗಳು ತಮ್ಮ ಬಣ್ಣವನ್ನು ತಿಳಿ ಹಳದಿ ಬಣ್ಣಕ್ಕೆ ಬದಲಾಯಿಸುತ್ತವೆಂದು ಸಂಶೋಧಕರು ಕೆಲವು ಪುರಾವೆಗಳಿಂದ ಕಂಡುಕೊಂಡಿದ್ದಾರೆ. ಮತ್ತೊಂದು ಪುರುಷ ಅಗಾಮವೇನಾದರೂ ಇವುಗಳೊಂದಿಗೆ ಹೋರಾಟಕ್ಕಿಳಿದರೆ, ಹೋರಾಟದ ಬಣ್ಣದ ಸಂಕೇತವೆನಿಸಿದ ಕೆಂಪು ಮತ್ತು ಹಳದಿ ಮಿಶ್ರಿತ ಬಣ್ಣವನ್ನು ಧರಿಸುತ್ತವೆ.

ಈ ಬಣ್ಣಗಳು, ಹಲ್ಲಿಗಳ ಜೀವವನ್ನು ರಕ್ಷಿಸಲು ಸಹ ಸಹಾಯ ಮಾಡುತ್ತವೆಂದು ಅಧ್ಯಯನದಲ್ಲಿ ಕಂಡುಬಂದಿದೆ. ಪರಭಕ್ಷಕಗಳಾದ ಹಿರಿಯ ಹಲ್ಲಿಗಳು ಅಥವಾ ಭಾರತದ ನರಿಗಳ ಉಪಸ್ಥಿತಿಯಲ್ಲಿ, ಅವುಗಳಿಂದ ಅನಗತ್ಯ ಗಮನವನ್ನು ಸೆಳೆಯಬಾರದೆಂದು, ಅಗಾಮಗಳು ತಮ್ಮ ಬಣ್ಣವನ್ನು ಬಿಳಿಯ ಬಣ್ಣಕ್ಕೆ ತ್ವರಿತವಾಗಿ ಬದಲಾಯಿಸುತ್ತವೆ. ಅಗಾಮಗಳು ತಮ್ಮ ವಿವಿಧ ವರ್ತನೆಗಳಿಂದ, ಭಿನ್ನವಾದ ಸಂಜ್ಞೆಗಳಿಂದ, ಬಗೆಬಗೆಯ ಸ್ವೀಕೃತಿಗಾರರಿಗೆ, ಬೇರೆ ಬೇರೆ ಸ್ವರೂಪದಲ್ಲಿ ಸಂಕೇತಿಸಲು ಸಾಧ್ಯವಿರುವುದರಿಂದ, ಈ ಕ್ಷೇತ್ರದಲ್ಲಿ ಇನ್ನೂ ಹೆಚ್ಚಿನ ಸಂಶೋಧನೆಯ ಅಗತ್ಯವಿದೆ.

ಸಂಶೋಧಕರು ಪ್ರತಿಯೊಂದು ಅಗಾಮದ ಸಂತಾನೋತ್ಪತ್ತಿ ಅವಧಿಯನ್ನು ಪರಿಶೀಲಿಸುತ್ತಾ ಹೋದಂತೆ, ಈ ಅಗಾಮಗಳು ನೀಡುವ ಬಹುಸಂಜ್ಞೆಗಳು, ಹೆಚ್ಚು ಸಂಗಾತಿಗಳನ್ನು ಹೊಂದಲು ಮತ್ತು ಹೆಚ್ಚು ಶಿಶುಗಳನ್ನು ಉತ್ಪತ್ತಿ ಮಾಡಲು ಸಹಾಯ ಮಾಡುತ್ತಿರುವುದರಿಂದ – ಇದು ಅವುಗಳ ಅರ್ಹತೆಯ ಅಳತೆಗೋಲಾಗಿದೆ ಎಂದು ತಿಳಿದುಬಂದಿದೆ. ಸಂತಾನೋತ್ಪತ್ತಿಯ ಅವಧಿಯು, ಸಂತಾನೋತ್ಪತ್ತಿಯ ಕಾಲದಲ್ಲಿ ಅಂದರೆ ಸಾಮಾನ್ಯವಾಗಿ ಮೇ ತಿಂಗಳಿನಿಂದ ಸೆಪ್ಟೆಂಬರ್ ವರೆಗೆ ಬಂಡೆಗಳ ಮೇಲೆ ಕುಳಿತುಕೊಳ್ಳುವ ಅವಧಿಯನ್ನು ಒಳಗೊಂಡಿದೆ. ಒಂದು ದಿನದಲ್ಲಿ ಪ್ರತಿ ಪುರುಷ ಅಗಾಮವು ಎಷ್ಟು ಹೆಣ್ಣು ಅಗಾಮಗಳನ್ನು ಸಂಧಿಸಬಹುದೆಂಬುದನ್ನು ಪರಿಶೀಲಿಸಿದ್ದಾರೆ. ಇವುಗಳು ಕಲ್ಲು ಬಂಡೆಯ ಮೇಲೆ ಹೆಚ್ಚು ಸಮಯ ಕಳೆದಷ್ಟೂ, ಹೆಚ್ಚು ಸಂಖ್ಯೆಯ ಮಹಿಳೆ ಅಗಾಮಗಳನ್ನು ಸಂಧಿಸುತ್ತವೆ ಮತ್ತು ಹೆಚ್ಚು ಸಂತಾನವನ್ನು ಪಡೆಯುತ್ತವೆ. ಸಂಶೋಧಕರು ಗಮನಿಸಿರುವಂತೆ ಹೆಚ್ಚು ಸಂಜ್ಞೆಗಳನ್ನು ನೀಡುವ ಮತ್ತು ಹೆಚ್ಚು ಸಂತಾನೋತ್ಪತ್ತಿಯ ಅವಧಿಯನ್ನು ಹೊಂದಿರುವ ಅಗಾಮಗಳು, ಹೆಚ್ಚಿನ ಸಾಮರ್ಥ್ಯವನ್ನು ಹೊಂದಿರಬಹುದು.

ಸಂಶೋಧನೆಯಲ್ಲಿನ ಒಂದು ಫಲಿತಾಂಶವು ಸಂಶೋಧಕರಿಗೆ ನೀಡಿದ ಅಚ್ಚರಿಯೇನೆಂದರೆ, ದೊಡ್ಡ ಹಲ್ಲಿಗಳಿಗಿಂತ ಸಣ್ಣ ಹಲ್ಲಿಗಳು ತಮ್ಮ ಆರಂಭಿಕ ಸಂತಾನೋತ್ಪತ್ತಿಯ ಅವಧಿಯಲ್ಲಿ, ಹೆಚ್ಚಿನ ಹೆಣ್ಣು ಹಲ್ಲಿಗಳಿಗೆ ಜಾಗವನ್ನೊದಗಿಸಬಲ್ಲವು! ಯೌವ್ವನಾವಸ್ಥೆಯಲ್ಲಿರುವ ಸಣ್ಣ ಪುರುಷ ಅಗಾಮಗಳು, ವಯಸ್ಕ ಅಗಾಮಗಳಿಗಿಂತ ಸುಲಭವಾಗಿ ಜಾಗವನ್ನು ಕಾಪಾಡಿಕೊಳ್ಳುವವು ಮತ್ತು ಹೆಚ್ಚು ಬಲಾಢ್ಯರು ಹಾಗೂ ಸಮರ್ಥರಾಗಿರಬಹುದು.

ಈ ಅಧ್ಯಯನವು ಅಗಾಮಗಳ ಮೇಲೆ ನಡೆಯುತ್ತಿರುವ ಧೀರ್ಘಕಾಲೀನ ಯೋಜನೆಯ ಒಂದು ಭಾಗವಾಗಿದ್ದು, ಇದು ಭಾರತದಲ್ಲಿ ಈ ತರಹದ ಅಧ್ಯಯನವನ್ನು ಕೈಗೊಳ್ಳುವ ಕೆಲವೇ ಕೆಲವು ರೀತಿಗಳಲ್ಲಿ ಒಂದಾಗಿದೆ. ಕಾಲಾನುಕ್ರಮದಲ್ಲಿ ಕಾಡು ಪ್ರಾಣಿಗಳನ್ನು ವ್ಯವಸ್ಥಿತವಾಗಿ ಅಧ್ಯಯನ ನಡೆಸುವುದರಿಂದ, ಗಂಡು ಪ್ರಾಣಿಗಳು ಎಷ್ಟು ಸಮರ್ಥರು ಹಾಗೂ ತಮ್ಮ ನಡವಳಿಕೆಗಳಿಂದ ಪರಸ್ಪರ ಹೇಗೆ ಪ್ರಭಾವಿತವಾಗಿರುತ್ತವೆ ಎಂದು ಅರ್ಥ ಮಾಡಿಕೊಳ್ಳಲು ಸಹಕಾರಿ; ಈ ಅಧ್ಯಯನಗಳು, ನೈಸರ್ಗಿಕ ಜಗತ್ತಿನಲ್ಲಿ ಲೈಂಗಿಕ ಆಯ್ಕೆಯ ಒತ್ತಡಗಳು ಹೇಗೆ ಹೊರಹೊಮ್ಮುತ್ತವೆ ಎಂಬ ಅಪರೂಪದ ಒಳನೋಟವನ್ನು ನೀಡುತ್ತವೆ.

[ವೀಡಿಯೊ: ಶ್ರೀಕಾಂತ್ ದಿಯೋಧರ್]